ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ

     ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ສູນພັດທະນາຫຼັກສູດ ແລະ ຝຶກອົບຮົມ ຮ່ວມກັບ ໂຮງຮຽນ ມສ ໂພນງາມ, ເມືອງໄຊທານີ ນະຄອນຫຼວງວຽງຈັນ ໄດ້ຈັດກິດຈະກຳ “ສ້າງຈິດສໍານຶກ ຄວາມຮູ້ພື້ນຖານ ດ້ານດາລາສາດ" ຂຶ້ນ ໃນວັນທີ 18 ກຸມພາ 2026 ທີ່ຜ່ານມາ ຢູ່ຫ້ອງປະຊຸມໃຫຍ່ຂອງໂຮງຮຽນ, ໂດຍມີຄະນະ ອໍານວຍການໂຮງຮຽນ ແລະ ຄູອາຈານ ພ້ອມດ້ວຍ ນັກຮຽນ ຊັ້ນ ມໍ4 ຫາ ມໍ7 ເຂົ້າຮ່ວມຢ່າງຟົດຟື້ນ ຈານວນ 100 ກວ່າຄົນ

     ກິດຈະກຳໃນຄັ້ງນີ້ ຈັດຂຶ້ນໂດຍມີຈຸດປະສົງ ເພື່ອປູກຝັງຄວາມສົນໃຈ ແລະ ເປີດໂລກທັດທາງດ້ານ ດາລາສາດ ໃຫ້ແກ່ນ້ອງນັກຮຽນ, ພ້ອມທັງສ້າງພື້ນຖານ ຄວາມເຂົ້າໃຈກ່ຽວກັບ ຈັກກະວານ, ດວງດາວ ແລະ ລະບົບສຸລິຍະ ທີ່ຖືກຕ້ອງຕາມຫຼັກວິທະຍາສາດ. ພາຍໃນງານ ມີການບັນຍາຍ ແລະ ສາຍວີດີໂອ ກ່ຽວກັບ ການກຳເນີດ ຂອງຈັກກະວານ, ປະກົດການທາງດາລາສາດທີ່ສໍາຄັນ ເຊັ່ນ: ສຸລິຍະຄາດ ແລະ ຈັນທະຄາດ, ພ້ອມທັງມີການ ສາທິດການເບິ່ງກຸ່ມດາວ, ການເບິ່ງທ້ອງຟ້າຈໍາລອງໃນໂດມ ໃຫ້ນັກຮຽນໄດ້ທົດລອງປະຕິບັດຕົວຈິງ ເຊິ່ງສ້າງຄວາມ ຕື່ນຕາຕື່ນໃຈ ແລະ ດຶງດູດຄວາມສົນໃຈຈາກນັກຮຽນໄດ້ເປັນຢ່າງດີ ໂດຍໄດ້ຮັບຟັງການບັນລະຍາຍ ຈາກອາຈານ ສົມສັກ ອາລຸນສະຫວັດ ຫົວໜ້າສູນ ຮັບຜິດຊອບວຽກງານດາລາສາດ.

     ໃນຄັ້ງວັນທີ 10 ທັນວາ 2025 ທີ່ຜ່ານມາ, ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ໄດ້ເປີດກອງປະຊຸມພົບປະປຶກສາຫາລື ແນວທາງການຮ່ວມມືກັບ ວິທະຍາຄານຍຸດທະສາດວິທະຍາສາດ ແລະ ເຕັກໂນໂລຊີ, ກະຊວງວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ.ທີ່ຫ້ອງປະຊຸມຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ.

     ຈຸດປະສົງຂອງການເປີດກອງປະຊຸມພົບປະປຶກສາຫາລືໃນຄັ້ງນີ້ ແມ່ນເພື່ອສືບຕໍ່ການຮ່ວມມື ກໍ່ຄື ການຈັດຕັ້ງຜັນຂະຫຍາຍບົດບັນທຶກຄວາມເຂົ້າໃຈ ທີ່ໄດ້ລົງນາມຮ່ວມສອງຝ່າຍດັ່ງນີ້:

• ສ້າງຄວາມເຂັ້ມແຂງໃຫ້ພະນັກງານຮັບຜິດຊອບ ການຄຸ້ມຄອງການເຄື່ອນໄຫວວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ ຢູ່ສູນກາງ ແລະ ທ້ອງຖິ່ນ ຂອງ ສປປ ລາວ;
• ສ້າງ ແລະ ພັດທະນາຫຼັກສູດຝຶກອົບຮົມ, ຈັດຝຶກອົບຮົມກ່ຽວກັບ ການຄຸ້ມຄອງການເຄື່ອນໄຫວວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ;
• ການປັບປຸງ ແລະ ພັດທະນາພື້ນຖານໂຄງລ່າງການຄົ້ນຄວ້າວິທະຍາສາດ;
• ການພັດທະນາລະບົບຂໍ້ມູນຂ່າວສານວິທະຍາສາດ ແລະ ເຕັກກໂນໂລຊີ ແລະ ການຫັນວາລະສານວິທະຍາສາດ-ເຕັກນິກ ເປັນດິຈິຕອນ.

     ໃນວັນທີ 5 ທັນວາ 2025 ທີ່ຜ່ານມາ, ເວລາ 10:00 ໂມງ ຢູ່ທີ່ ຫ້ອງປະຊຸມຫ້ອງການສະພາວິທະຍາສາດແຫ່ງຊາດ. ກະຊວງສຶກສາທິການ ແລະ ກິລາ ໄດ້ຈັດພິທີປະກາດການແຕ່ງຕັ້ງ ພະນັກງານດຳລົງຕຳແໜ່ງບໍລິຫານປະເພດ 3 ຂອງ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ຮ່ວມກັບ ຫ້ອງການສະພາວິທະຍາສາດແຫ່ງຊາດ ຈັດຂື້ນຢ່າງເປັນທາງການ, ໂດຍໃຫ້ກຽດເຂົ້າຮ່ວມ ແລະ ເປັນປະທານ ຂອງທ່ານ ຮສ ປອ. ສິນທະວອນ ດາລາວົງ, ກຳມະການຄະນະປະຈຳພັກ, ປະທານກວດກາພັກ, ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ, ສສກ, ມີ ຜູ້ອຳນວຍການສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ (ສວນ), ວ່າການແທນຫົວໜ້າຫ້ອງການສະພາວິທະຍາສາດແຫ່ງຊາດ (ຫສວຊ), ຄະນະຫ້ອງການ (ຫສວຊ), ຄະນະອຳນວຍການ (ສວນ), ຕາງໜ້າຈາກກົມຈັດຕັ້ງ ແລະ ພະນັກງານ, ກົມກວດກາ, ກົມຄຸ້ມຄອງວິທະຍາສາດ ພ້ອມດ້ວຍພະນັກງານທັງສອງພາກສ່ວນເຂົ້າຮ່ວມ.

    ພິທີໄດ້ປະກາດແຕ່ງຕັ້ງ ພະນັກງານດຳລົງຕຳແໜ່ງບໍລິຫານ ປະເພດ 3 ມີລາຍຊື່ດັ່ງນີ້:

1. ທ່ານ ສຸວັນ ການສິນໄຊ ເປັນ ຮອງຫົວໜ້າ ຫ້ອງການສະພາວິທະຍາສາດແຫ່ງຊາດ;
2. ທ່ານ ອານຸສິນ ແສງສຸລິນ ເປັນ ຮອງຜູ້ອຳນວຍການສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ.

     ກອງປະຊຸມປະເມີນໜ່ວຍພັກ ແລະ ສະມາຊິກພັກ ປອດໃສ, ເຂັ້ມແຂງ, ໜັກແໜ້ນຂອງໜ່ວຍພັກຮາກຖານ ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ປະຈໍາປີ 2025 ໄດ້ເປີດຂຶ້ນ ໃນຕອນເຊົ້າ ເວລາ 07:30 ຂອງວັນທີ ວັນທີ 26 ພະຈິກ 2025 ທີ່ຜ່ານມາ ທີ່ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ.

     ກອງປະຊຸມຄັ້ງນີ້ ໃຫ້ກຽດຕ້ອນຮັບ ແລະ ເປັນປະທານຮ່ວມໂດຍ ສະຫາຍ ຮສ ປອ. ສິນທະວອນ ດາລາວົງ, ກຳມະການຄະນະປະຈຳພັກ, ປະທານກວດກາພັກ, ຮອງຜູ້ອຳນວຍການໃຫຍ່ ມະຫາວິທະຍາໄລແຫ່ງຊາດ ແລະ ສະຫາຍ ປອ. ສີພອນ ແສງສຸລິຈັນ ເລຂາໜ່ວຍພັກຮາກຖານ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ມີ ສະຫາຍ ບຸນມີ ພິພັກຄະວົງ ຮອງປະທານກຳມະບານ ສສກ ແລະ ສະມາຊິກພັກສົມບູນ, ສໍາຮອງ ພາຍໃນໜ່ວຍພັກເຂົ້າ​ຮ່ວມ ເຊິ່ງລວມມີທັງໝົດ 28 ສະຫາຍ ຍິງ 09 ສະຫາຍ.

     ຈຸດປະສົງ ຂອງ ກອງປະຊຸມໃນຄັ້ງນີ້ ໜຶ່ງ: ປະເມີນໜ່ວຍພັກ ແລະ ສະມາຊິກພັກທັງໝົດຂອງໜ່ວຍພັກຮາກຖານສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ; ສອງ: ຜ່ານຮ່າງບົດສະຫຼຸບກໍ່ສ້າງໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈຳປີ 2025 ແລະ ທິດທາງແຜນການ ປີ 2026

     ໜ່ວຍພັກຮາກຖານສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ(ສວນ) ໄດ້ຈັດພິທີຮັບເອົາມະຫາຊົນກ້າວໜ້າເຂົ້າເປັນສະມາຊິກພັກສຳຮອງໃໝ່ ແລະ ຮັບສະມາຊິກພັກສຳຮອງເຂົ້າເປັນສະມາຊິກພັກສົມບູນ ຢູ່ທີ່ ຫ້ອງປະຊຸມ ຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ໃນເວລາ 08:00 – 11:30 ຂອງວັນທີ 18 ພະຈິກ 2005 ທີ່ຜ່ານມາ

     ຊຶ່ງໃຫ້ກຽດເປັນປະທານໂດຍ ສະຫາຍ  ຮສ.ປອ ຫຼ້າວັນ ວົງຄຳສານ ກໍາມະການຄະນະປະຈຳພັກກະຊວງ ​ ເຊິ່ງມີຜູ້​ເຂົ້າ​ຮ່ວມທັງໝົດ 25 ສະຫາຍ, ຍິງ 7 ສະຫາຍ.

     ກອງປະຊຸມສະຫຼຸບຜົນການປະເມີນຂໍ້ແຂ່ງຂັນ 4 ບຸກ ຂອງໜ່ວຍຮາກຖານຊາວໜຸ່ມສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ປະຈຳປີ 2025 ໄດ້ເປີດຂຶ້ນ ໃນຕອນເຊົ້າ ຂອງວັນທີ 29 ຕຸລາ 2025 ເວລາ 08:30 ທີ່ຫ້ອງເຝິກອົບຮົມ ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ (ສວນ).

     ໃຫ້ກຽດເປັນປະທານ ຂອງ ສະຫາຍ ປອ. ສີພອນ ແສງສຸລິຈັນ ເລຂາໜ່ວຍພັກຮາກຖານ ແລະ ສະຫາຍບຸນອ້ອມ ຈັນທະວົງສີ ເລຂາໜ່ວຍຮາກຖານຊາວໜຸ່ມ ສວນ, ມີ ສະຫາຍ ນາງ ຄຳບາງ ວິໄລສຸກ ຮອງເລຂາໜ່ວຍພັກຮາກຖານ ຜູ້ຊີ້ນຳວຽກງານອົງການຈັດຕັ້ງມະຫາຊົນ ແລະ ສະມາຊິກຊາວໜຸ່ມ ເຂົ້າຮ່ວມ ຈໍານວນ 16 ສະຫາຍ, ຍິງ 7 ສະຫາຍ.