ໃນພິທີທີ່ມີຄວາມໝາຍສໍາຄັນນີ້ ນອກຈາກທົບຄວນຄືນມູນເຊື້ອ, ບົດບາດ ຄວາມໝາຍຄວາມສໍາຄັນ ຂອງ ສອງວັນປະຫວັດສາດດັ່ງກ່າວ ຍັງໄດ້ມີພິທີຍ້ອງຍໍມອບ-ຮັບ ນາມມະຍົດຄູປະຊາຊົນ ຈໍານວນ 02 ທ່ານ, ຕໍາແໜ່ງວິຊາການຂັ້ນຮອງສາດສະດາຈານ ຈໍານວນ 14 ທ່ານ ແລະ ຫົວບົດຄົ້ນຄວ້າວິທະຍາສາດທີ່ດີເດັ່ນ ຈໍານວນ 20 ຫົວບົດ; ກອງປະຊຸມສໍາມະນາວຽກງານການຄົ້ນຄວ້າວິທະຍາສາດ ລະຫວ່າງ ນັກຄົ້ນຄວ້າວິທະຍາສາດ, ຜູ້ປະກອບການ ແລະ ອົງການຈັດຕັ້ງ ຂອງລັດ.
ໄປຄຽງຄູ່ກັບພິທີດັ່ງກ່າວ, ກະຊວງສຶກສາທິການ ແລະ ກິລາ ໄດ້ມີພິທີເປີດງານວາງສະແດງຜົນງານການຄົ້ນຄວ້າວິທະຍາສາດ, ເຕັກໂນໂລຊີ ແລະ ນະວັດຕະກໍາ ເພື່ອສະເຫຼີມສະຫຼອງ 02 ວັນປະຫວັດສາດດັ່ງກ່າວ ແລະ ຊົມເຊີຍຜົນສໍາເລັດກອງປະຊຸມໃຫຍ່ ຜູ້ແທນອົງຄະນະພັກກະຊວງສຶກສາທິການ ແລະ ກິລາ ໃນວັນດຽວກັນ; ແລະ ໃນໂອກາດອັນສະຫງ່າລາສີ, ມີຄວາມໝາບສໍາຄັນດັ່ງກ່າວ ໄດ້ຮັບກຽດເປັນຢ່າງສູງຂໍ່ານັບຮັບຕອນ ພະນະທ່ານຮອງນາຍົກລັດຖະມົນຕີ ແຫ່ງ ສປປ ລາວ ທີ່ໄດ້ເສຍສະຫຼະເວລາອັນມີຄ່າ ເຂົ້າງານວາງສະແດງຄັ້ງນີ້ ແລະ ທ່ານລັດຖະມົນຕີກະຊວງສຶກສາທິການ ແລະ ກິລາ ໄດ້ໃຫ້ກຽດຕັດແຖບຜ້າເປີດງານຢ່າງເປັນທາງການ. ການຈັດງານວາງສະແດງຄັ້ງນີ້ ມີຈຸດປະສົງ ແລະ ຄາດໝາຍ ເພື່ອ 1) ໂຄສະນາເຜີຍແຜ່ ແລະ ສ້າງຈິດສໍານຶກ ໃຫ້ທົ່ວສັງຄົມ, ຖັນແຖວພະນັກງານ, ຄູອາຈານ, ນັກຮຽນ-ນັກສຶກສາ ມີຄວາມຮັບຮູ້ ແລະ ເຂົ້າໃຈ ກ່ຽວກັບບົດບາດ ຄວາມສໍາຄັນ ຂອງອາຊີບຄູ, ການບໍາລຸງສ້າງ ພັດທະນາຄູ, ວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ ໂດຍສະເພາະ ການຄົ້ນຄວ້າວິທະຍາສາດ ຕໍ່ກັບ ການພັດທະນາເສດຖະກິດ-ສັງຄົມ ຂອງ ສປປ ລາວໃນປະຈຸບັນ ແລະ ອານາຄົດ; ແລະ 2) ຊຸກຍູ້ສົ່ງເສີມການນໍາໃຊ້ຜົນງານການຄົ້ນຄວ້າວິທະຍາສາດ ເຂົ້າໃນຂະບວນການຜະລິດໃຫ້ກາຍເປັນຜະລິດຕະພັນ, ສິນຄ້າ ແລະ ການບໍລິກການ ອອກສູ່ສັງຄົມ ແລະ ປະກອບສ່ວນເຮັດໃຫ້ຄຸນນະພາບ, ສ້າງມູນຄ່າເພີ່ມໃຫ້ແກ່ຜະລິດຕະພັນ ຂອງ ສປປ ລາວ ໃຫ້ສາມາດແຂ່ງຂັນກັບສິນຄ້ານໍາເຂົ້າອື່ນໆ.
ພາກສ່ວນເຂົ້າຮ່ວມງານວາງສະແດງຄັ້ງນີ້ ມີທັງໝົດ ຈໍານວນ 34 ບູດ, ຊຶ່ງບັນດາພາກສ່ວນເຂົ້າຮ່ວມງານວາງສະແດງ ແມ່ນມາຈາກກະຊວງສຶກສາທິການ ແລະ ກິລາ, ມະຫາວິທະຍາໄລແຫ່ງຊາດ, ບັນດາສະຖາບັນຄົ້ນຄວ້າ ຂອງບາງຂະແໜງການ, ຜູ້ປະກອບການຈາກພາກທຸລະກິດ-ເອກະຊົນ ແລະ ໄດ້ສ້າງຄວາມສົນໃຈ, ຄວາມຮັບຮູ້ ໃຫ້ຜູ້ເຂົ້າຮ່ວມ, ເຂົ້າຊົມ ໂດຍສະເພາະ ແມ່ນບັນດານັກຮຽນ-ນັກສຶກສາ ໄດ້ເປັນຢ່າງດີ.
ຍັງຮູບພາບບາງສ່ວນຈະທະຍອຍອັບເດດລົງຕື່ມໃນມໍ່ໆນີ້