ຈຸດປະສົງຂອງການຮ່ວມມືກັນຄັ້ງນີ້ແມ່ນ ເພື່ອເປັນການແລກປ່ຽນຂໍ້ມູນຂ່າວສານ, ການຊຸກຍູ້ສົ່ງເສີມ ແລະ ການຕິດຕາມບັນດາກິດຈະກຳຕ່າງໆ ໃນຂົງເຂດວຽກງານການຄົ້ນຄ້ວາ-ວິໄຈ, ການເຝຶກອົບຮົມ, ການໃຫ້ຄຳປຶກສາ ແລະ ສະໜອງຂໍ້ມູນທາງດ້ານວິທະຍາສາດ ທີ່ໄດ້ດຳເນີນຮ່ວມກັນ ລະຫວ່າງ ສອງຝ່າຍ ໃນຂົງເຂດຕ່າງໆເຊັ່ນ: ຊີວະວິທະຍາ, ເຄມີ, ທໍລະນີວິທະຍາ, ວິທະຍາສາດສິ່ງແວດລ້ອມ ແລະ ອື່ນໆ.
ການລົງນາມໃນບົດບັນທຶກຄວາມເຂົ້າໃຈຄັ້ງນີ້ ຝ່າຍກະຊວງສຶກສາທິການ ແລະ ກິລາ, ສປປ ລາວ ຕາງໜ້າໂດຍ ສະຖາບັນຄົ້ນຄ້ວາວິທະຍາສາດ ແລະ ນະວັດຕະກຳ ແມ່ນ ທ່ານ ປອ. ສີພອນ ແສງສຸລິຈັນ, ວ່າການແທນ ຜູ້ອໍານວຍການ ແລະ ສະຖາບັນຄົ້ນຄ້ວາເພື່ອການພັດທະນາ, ປະເທດ ຝຣັ່ງ ຕາງໜ້າໂດຍແມ່ນ ທ່ານ ນາງ ຊາບຣີນາ ໂລກາເຕລີ ໂດຍເປັນກຽດເຂົ້າຮ່ວມເປັນສັກຂີພະຍານຂອງ ທ່ານ ລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ຮອງເຈົ້າແຂວງ ແຂວງຄຳມ່ວນ, ທ່ານ ເຈົ້າເມືອງ ເມືອງນາກາຍ, ທ່ານ ປະທານ ຜູ້ບໍລິຫານ ບໍລິສັດ ໄຟຟ້າ ນໍ້າເທີນ 2 ຈຳກັດ ຊ້ອງໜ້າພະນັກງານທັງສອງຝ່າຍທີ່ເຂົ້າຮ່ວມ; ເຊຶ່ງສັນຍາການຮ່ວມມືກັນດ້ານວິຊາການຄັ້ງນີ້ ມີເວລາທັງໝົດ 05 ປີ.
ພາບ-ຂຽນຂ່າວໂດຍ: ທ. ວົງພະຈັນ ຈັດຕະວາກຸນ