ທ່ານ ປອ ນະຄອນຄໍາ ໄຊບົວເງິນ ຫົວໜ້າສູນພັດທະນາຫຼັກສູດ ແລະ ຝຶກອົບຮົມ ໄດ້ກ່າວວ່າ: “ການ ຈັດກິດຈະກຳໃນຄັ້ງນີ້ ແມ່ນສ່ວນໜຶ່ງຂອງການສ້າງຈິດສໍານຶກດ້ານດາລາສາດ ແລະ ການພັດທະນາການຮຽນ-ການ ສອນ ວິຊາວິທະຍາສາດ. ຫວັງວ່າ ຄວາມຮູ້ພື້ນຖານທີ່ນ້ອງໆໄດ້ຮັບໃນມື້ນີ້ ຈະເປັນແນວທາງໃຫ້ເຂົາເຈົ້າຢາກຮຽນຮູ້ ຄົ້ນຄວ້າເພີ່ມເຕີມ ແລະ ບາງຄົນອາດຈະເຕີບໃຫຍ່ໄປເປັນນັກດາລາສາດ ຫຼື ນັກວິທະຍາສາດ ທີ່ສໍາຄັນຂອງຊາດ ໃນອະນາຄົດ."
ນາງ ເບົາໃບ ວ່າງ, ນັກຮຽນ ຊັ້ນ ມໍ6 ໄດ້ໃຫ້ສໍາພາດວ່າ: “ດີໃຈຫຼາຍທີ່ໄດ້ເຂົ້າຮ່ວມກິດຈະກຳໃນມື້ນີ້. ປົກກະຕິຂ້ອຍມັກເບິ່ງດວງດາວ ແຕ່ບໍ່ເຄີຍຮູ້ລາຍລະອຽດເລິກເຊິ່ງ ແລະ ນີ້ເປັນຄັ້ງທໍາອິດທີ່ໄດ້ເຫັນດວງຈັນ ແລະ ດາວເຄາະຜ່ານກ້ອງສ່ອງທ້ອງຟ້າ ມັນສວຍງາມ ແລະ ເຮັດໃຫ້ເກີດຈິນຕະນາການຫຼາຍຂຶ້ນ. ຂ້ອຍຈະເອົາຄວາມຮູ້ ນີ້ໄປບອກໝູ່ ແລະ ໄປຊອກຮຽນຮູ້ຕື່ມອີກ.”
ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ມີແຜນຈະສືບຕໍ່ຈັດກິດຈະກຳແບບນີ້ເປັນປະຈຳທຸກປີ ເພື່ອກະຕຸ້ນຄວາມສົນໃຈ ແລະ ຍົກລະດັບຄວາມຮູ້ດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ ໃຫ້ ແກ່ນັກຮຽນຢ່າງຕໍ່ເນື່ອງ.
