ຈຸດປະສົງ ຂອງ ກອງປະຊຸມໃນຄັ້ງນີ້ ໜຶ່ງ: ຜ່ານບົດລາຍງານການເມືອງ, ບົດສໍາຫຼວດການນໍາພາລວມ ຂອງໜ່ວຍພັກຮາກຖານ ແລະ ປະກອບຄໍາເຫັນໃສ່ຮ່າງບົດດັ່ງກ່າວ ໃຫ້ມີເນື້ອໃນຄົບຖ້ວນ ແລະ ໃຫ້ສາມາດຜັນຂະຫຍາຍເປັນອັນລະອຽດໃນພາກປະຕິບັດຕົວຈິງ. ສອງ: ດໍາເນີນການປ່ອນບັດຄັດເລືອກບຸກຄະລາກອນ ທີ່ໄດ້ເປັນເປົ້າໝາຍລົງສະໝັກເລືອກຕັ້ງໃນຄະນະໜ່ວຍພັກຮາກຖານສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ.
ກອງປະຊຸມໃຫ່ຍສະມາຊິກພັກຄັ້ງທີ II ຂອງໜ່ວຍພັກຮາກຖານ ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ໄດ້ລົງມະຕິ ເປັນເອກະສັນຮັບຮອງເອົາ ບັນດາເນື້ອໃນສຳຄັນຕ່າງໆ ດັ່ງນີ້້:
I. ໄດ້ພ້ອມກັນຄົ້ນຄວ້າ, ປະກອບຄໍາຄິດເຫັນໃສ່ບົດລາຍງານການເມືອງ ແລະ ບົດສໍາຫຼວດການນໍາພາ ຂອງຄະນະໜ່ວຍພັກ ແລະ ໄດ້ເປັນເອກະພາບ ຕໍ່ການຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາຍເຫດ, ບົດຮຽນໃນການນໍາພາ-ຊີ້ນໍາ ແລະ ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ກໍ່ຄື ພາລະບົດບາດ ແລະ ໜ້າທີ່ຂອງຕົນໃນ 05 ປີ ຜ່ານມາ. ພ້ອມກັນນີ້, ກອງປະຊຸມຍັງໄດ້ເປັນເອກະພາບ ຮັບຮອງເອົາທິດທາງລວມ, ເປົ້າໝາຍສູ້ຊົນ ແລະ ວຽກງານຈຸດສຸມ ໃນຊຸມປີຕໍ່ໜ້ານັບ ແຕ່ປີ 2024-2029 ຊຶ່ງມີເນື້ອໃນສໍາຄັນ ດັ່ງນີ້:
- ສືບຕໍ່ຈັດຕັ້ງປະຕິບັດແນວທາງນະໂຍບາຍ, ມະຕິ, ຄໍາສັງຂອງຂັ້ນເທິງ, ແຜນພັດທະນາເສດຖະກິດ-ສັງຄົມ ແຫ່ງຊາດ, ແຜນພັດທະນາຂະແໜງສຶກສາ, ວິທະຍາສາດ ແລະ ກິລາ ແລະ ຫັນມາເປັນ ແຜນການ, ແຜນງານ, ໂຄງການ, ກິດຈະກໍາ ສະເພາະ ໃຫ້ມີປະສິດທິພາບ ແລະ ປະສິດທິຜົນ;
- ສູ້ຊົນຮັກສາການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ຢ່າງຕໍ່ເນື່ອງ ຄຽງຄູ່ກັບ ການສຶກສາອົບຮົມການເມືອງ-ແນວຄິດ ໃນຖັນແຖວສະມາຊິກພັກ-ພະນັກງານ ໃຫ້ມີຄວາມໜັກແໜ້ນທາງດ້ານຄຸນທາດການເມືອງ ແລະ ອຸ່ນອຽນທຸ່ນທ່ຽງທາງດ້ານແນວຄິດ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບສູງ;
- ສືບຕໍ່ການປັບປຸງກົງຈັກການຈັດຕັ້ງ, ພາລະບົດບາດ, ໜ້າທີ່ ຂອງສະຖາບັນໃຫ້ສອດຄ່ອງກັບສະພາບການຂະຫຍາຍຕົວຂອງວຽກງານແຕ່ລະໄລຍະ; ເອົາໃຈໃສ່ຍົກສູງຄວາມອາດສາມາດ, ການກໍ່ສ້າງ, ບໍາລຸງຍົກລະດັບພະນັກງານ-ລັດຖະກອນ ມີຄວາມຮູ້ວິຊາສະເພາະ ໃຫ້ເຂັ້ມແຂງ, ໜັກແໜ້ນ;
- ສືບຕໍ່ສູ້ຊົນພັດທະນາການຄົ້ນຄວ້າວິທະຍາສາດ ແລະ ນະວັດຕະກໍາ ໃນການສຶກສາຄົ້ນຄວ້າລົດລອງສ້າງເປັນຜະລິດຕະພັນຕົວແບບ ອອກຮັບໃຊ້ສັງຄົມ;
- ສືບຕໍ່ກໍ່ສ້າງສະມາຊິກພັກ-ພະນັກງານ ໃຫ້ມີຄຸນທາດການເມືອງ, ມີຄຸນສົມບັດສິນທໍາປະຕິວັດທີ່ແທ້ຈິງ, ເປັນແບບຢ່າງໃນການປະຕິບັດໜ້າທີ່ວຽກງານ;
- ສືບຕໍ່ການຮ່ວມມື, ການຊ່ວຍເຫຼືອ ທາງດ້ານເຕັກນິກວິຊາການ, ງົບປະມານ ທັງພາຍໃນ ແລະ ຕ່າງປະເທດ, ເພື່ອມາສະໜັບສະໜູນກິດຈະກໍາຕ່າງໆ ທີ່ໄດ້ກໍານົດໃນແຜນພັດທະນາວຽກງານ ຂອງ ສະຖາບັນ ປີ 2026-2030 ໃຫ້ບັນລຸຕາມຄາດໝາຍທີ່ໄດ້ກໍານົດໄວ້.
II. ໃນວາລະທີ 2, ສະມາຊິກພັກສົມບູນ ໄດ້ພ້ອມກັນໃຊ້ສິດ ປະຊາທິປະໄຕ ຂອງຕົນປ່ອນບັດເລືອກເອົາຄະນະໜ່ວຍພັກຮາກຖານ ຊຸດໃໝ່, ເຊິ່ງມີຜູ້ອອກຮັບສະໝັກເລືອກຕັ້ງ ຄະນະໜ່ວຍພັກ ທັງໝົດ 05 ສະຫາຍ (ຍິງ 03 ສະຫາຍ) ແລະ ເລືອກໄດ້ 3 ສະຫາຍ ແລະ ກອງປະຊຸມ ຄັ້ງປະຖົມມະລຶກ ໄດ້ຄົ້ນຄວ້າ ແລະ ເປັນເອກະພາບ ເລືອກເອົາເລຂາໜ່ວຍພັກຮາກຖານ; ຮອງເລຂາໜ່ວຍພັກຮາກຖານ; ຜູ້ກວດກາ ແລະ ຄະນະກໍາມະການໜ່ວຍພັກຮາກຖານ. ພ້ອມນັ້ນ ຍັງໄດ້ຄົ້ນຄວ້າ ແລະ ເປັນເອກະພາບ ເລືອກເອົາ 01 ສະຫາຍ ເປັນຮອງຜູ້ກວດກາໜ່ວຍພັກຮາກຖານ.
ກອງປະຊຸມໃຫ່ຍ ມອບຄວາມຮັບຜິດຊອບໃຫ້ຄະນະໜ່ວຍພັກຮາກຖານ ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ສະໄໝທີ II ເປັນຜູ້ນໍາພາ, ຊີ້ນໍາການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງນີ້ ໃຫ້ປະກົດຜົນເປັນຈິງ.
III. ກອງປະຊຸມໃຫ່ຍ ໄດ້ຮັບຟັງການໂອ້ລົມ ຂອງສະຫາຍ ປອ. ຕຸດາວັນ ໜໍ່ເມືອງເສດ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ. ເຊິ່ງສະຫາຍ ໄດ້ສະແດງຄວາມຍ້ອງຍໍຊົມເຊີຍ ຕໍ່ການນໍາພາ-ຊີ້ນໍາ ຂອງຄະນະໜ່ວຍພັກຮາກຖານຊຸດເກົ່າ ທີ່ໄດ້ນໍາພາ-ຊີ້ນໍາ ສະມາຊິກພັກ, ພະນັກງານ ປະະຕິບັດໜ້າທີ່ການເມືອງ ໃນໄລຍະຊຸມປີຜ່ານມາ ທີ່ສາມາດຍາດໄດ້ຜົນສໍາເລັດຫລາຍດ້ານ, ພ້ອມກັນນັ້ນ ສະຫາຍ ຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ເຊິ່ງໄດ້ຮຽກຮ້ອງໜ່ວຍພັກ ກໍ່ຄື ບັນດາສະຫາຍສະມາຊິກພັກ ພາຍໃນໜ່ວຍພັກຮາກຖານ ຖືເອົາການກໍ່ສ້າງ ແລະ ປັບປຸງຕົນເອງຕາມ 05 ຫຼັກການ, 03 ທິດນໍາ ໂດຍຖືເອົາວຽກງານການເມືອງ-ແນວຄິດເປັນຫຼັກ, ການປະຕິບັດໜ້າທີ່ວຽກງານການເມືອງ ຂອງຕົນ ຢ່າງເປັນເຈົ້າການ, ມີຄວາມສາມັກຄີເປັນປຶກແຜ່ນ ໄປຄຽງຄູ່ກັບ ການຝຶກຝົນຫຼໍ່ຫຼອມຕົນເອງ ແລະ ຍົກລະດັບຄວາມຮູ້ຄວາມສາມາດ ໃຫ້ສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງໜ້າທີ່ວຽກງານ ໃນໄລຍະໃໝ່; ອັນສໍາຄັນ ແມ່ນການຍົກສູງສະຕິ ແລະ ຄວາມເປັນເຈົ້າການ ປະຕິບັດກົດລະບຽບພັກ ແລະ ນິຕິກໍາ ຂອງລັດ ຢ່າງເຂັ້ມງວດ. ສໍາລັບຄະນະໜ່ວຍພັກ ຊຸດໃໝ່ ຕ້ອງສືບຕໍ່ກໍາວຽກພັກ-ພະນັກງານ ໃຫ້ໜັກແໜ້ນ, ເພີ້ມທະວີປັບປຸງແບບແຜນການນໍາພາ ໃຫ້ແທດສະພາບຕົວຈິງ, ເພີ້ມທະວີຄວາມສາມັກຄີພາຍໃນພັກ ແລະ ມີຄວາມເປັນເອກະພາບສູງ; ຮັກສາມູນເຊື້ອສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ; ປະຕິບັດລະບອບປະຊຸມ ສ່ອງແສງລາຍງານຢ່າງເປັນປົກກະຕິ ແລະ ມີຄວາມເຊື້ອໝັ້ນ ຕໍ່ຄະນະໜ່ວຍພັກຮາກຖານຊຸດໃໝ່ ທີ່ຈະສືບຕໍ່ນໍາພາ-ຊີ້ນໍາ ຈັດຕັ້ງປະຕິບັດມະຕິກອງປະຊຸມໃຫ່ຍ ຂອງໜ່ວຍພັກ ໃຫ້ຍາດໄດ້ຜົນງານ ແລະ ມີຜົນສໍາເລັດ ຍິ່ງໃຫ່ຍກວ່າເກົ່າ.
ກອງປະຊຸມໃຫ່ຍ ສະແດງຄວາມຍ້ອງຍໍຊົມເຊີຍມາຍັງ ສະມາຊິກພັກ. ພະນັກງານ-ລັດຖະກອນ ຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ທີ່ໄດ້ພ້ອມກັນເອົາໃຈໃສ່ ຕັ້ງໜ້າປະຕິບັດໜ້າທີ່ວຽກງານ ດ້ວຍຄວາມຮັບຜິດຊອບສູງ; ພ້ອມດຽວກັນນີ້ ກອງປະຊຸມໃຫ່ຍ ຮຽກຮ້ອງໃຫ້ສະມາຊິກພັກ, ພະນັກງານ-ລັດຖະກອນ ຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ຈົ່ງເພີ່ມທະວີຄວາມສາມັກຄີ ຄວາມເປັນຈິດໜຶ່ງໃຈດຽວ ເປັນປຶກເປັນແຜ່ນ ເພື່ອຈັດຕັ້ງປະຕິບັດທິດທາງໜ້າທີ່ວຽກງານ ທີ່ກອງປະຊຸມໃຫ່ຍຄັ້ງທີ II ໄດ້ວາງອອກ ໃຫ້ມີຜົນສຳເລັດ ແລະ ປະກົດຜົນເປັນຈິງ.
ກອງປະຊຸມດັ່ງກ່າວໄດ້ດໍາເນີນໄປເປັນເວລາເຄິ່ງວັນ ແລະ ໄດ້ປິດລົງໃນເວລາ 12:00 ນາທີ ຂອງວັນດຽວກັນ.