ຈຸດປະສົງ ຂອງ ກອງປະຊຸມໃນຄັ້ງນີ້ ໜຶ່ງແມ່ນ ຜ່ານຮ່າງບົດລາຍງານການເມືອງ, ຮ່າງບົດສໍາຫຼວດການນໍາພາລວມ ຂອງໜ່ວຍພັກຮາກຖານ ແລະ ປະກອບຄໍາເຫັນໃສ່ຮ່າງບົດດັ່ງກ່າວ ໃຫ້ມີເນື້ອໃນຄົບຖ້ວນ ແລະ ໃຫ້ສາມາດຜັນຂະຫຍາຍເປັນອັນລະອຽດໃນພາກປະຕິບັດຕົວຈິງ. ສອງ ດໍາເນີນການປ່ອນບັດຄັດເລືອກບຸກຄະລາກອນ ທີ່ເປັນເປົ້າໝາຍລົງສະໝັກເລືອກຕັ້ງຄະນະໜ່ວຍພັກຮາກຖານຊຸດໃໝ່ (ຮອບທີ 1).
ໃນພິທີດັ່ງກ່າວ ສະຫາຍ ປອ ສີພອນ ແສງສຸລິຈັນ ກໍາມະການໜ່ວຍພັກຮາກຖານ ສວນ ໄດ້ຂຶ້ນຜ່ານຮ່າງບົດລາຍງານການເມືອງ ແລະ ສະຫາຍ ພິມພາ ອຸດທະຈັກ ເລຂາໜ່ວຍພັກຮາກຖານ ສວນ ໄດ້ຂຶ້ນຜ່ານຮ່າງບົດສຳຫຼວດການນຳພາລວມ. ຫຼັງຈາກນັ້ນ, ສະຫາຍ ປອ ຕຸດາວັນ ໜໍ່ເມືອງເສດ ຄະນະປະຈຳພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ໄດ້ມີຄຳເຫັນແນະນຳເພີ່ມເຕີມໃນການຈັດຕັ້ງປະຕິບັດກະກຽມເອກະສານຕ່າງໆ ຕໍ່ ກອງປະຊຸມໃຫຍ່ ຄັ້ງທີ II ຂອງໜ່ວຍພັກຮາກຖານສະຖາບັນ ເພື່ອເຮັດໃຫ້ກອງປະຊຸມນັ້ນໄດ້ຮັບຜົນອອກມາດີ ແລະ ໄດ້ຮັບຜົນສໍາເລັດຕາມຄາດໝາຍ.
ເພື່ອຄັດເລືອກເປົ້າໝາຍລົງສະໝັກເລືອກຕັ້ງ ໃນຄະນະໜ່ວຍພັກຮາກຖານຊຸດໃໝ່ ໃຫ້ຖືກຕ້ອງ ແລະ ສອດຄ່ອງ, ຕາງໜ້າກົມກວດກາ ໄດ້ຂຶ້ນຜ່ານມາດຖານ ແລະ ເງື່ອນໄຂຜູ້ທີ່ຈະລົງສະໝັກ ຕໍ່ກອງປະຊຸມ ແລະ ຕາງໜ້າກົມຈັດຕັ້ງ ແລະ ພະນັກງານ ໄດ້ນໍາພາດໍາເນີນການປ່ອນບັດຄັດເລືອກບຸກຄະລາກອນ (ຮອບທີ 1).
ກອງປະຊຸມດັ່ງກ່າວໄດ້ດໍາເນີນໄປເປັນເວລາເຄິ່ງວັນ ແລະ ໄດ້ປິດລົງໃນເວລາ 16:30 ນາທີ ຂອງວັນດຽວກັນ.