ໃນວັນທີ 26 ມີນາ 2025, ສູນຄົ້ນຄວ້າສິ່ງທີ່ມີຊີວິດ (ສຄວ) ໄດ້ຈັດພິທີເປີດ ຝຶກອົບຮົມກ່ຽວກັບການບັນລະຍາຍ ວິທີການນຳໃຊ້ເຄື່ອງ ໂອໂຕມິດ ອັບຊອບເຊິນ ສະເປັກໂຕເມເຕີ ( Atomic Absorption Spectrometer (AAS)). ເຊິ່ງຈັດຂຶ້ນຢູ່ທີ່ ຫ້ອງປະຊຸມ ຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ.

     ໃນພິທີດັ່ງກ່າວ ໃຫ້ກຽດເປັນປະທານ ຂອງ ທ່ານ ປອ ສີພອນ ແສງສຸລິຈັນ ວ່າການແທນຜູ້ອຳນວຍການສະ​ຖາ​ບັນ​ຄົ້ນຄວ້າ​ວິທະຍາສາດ ​ແລະ  ນະວັດຕະກໍາ, ບັນດາອາຈານຈາກຄະນະວິທະຍາສາດທຳມະຊາດ, ມະຫາວິທະຍາໄລແຫ່ງຊາດ, ບັນດາຫົວໜ້າສູນ, ຄະນະສູນ, ຫົວໜ້າພະແນກ ແລະ ພະນັກງານວິຊາການ ພາຍໃນ ສວນ ​ເຂົ້າ​ຮ່ວມທັງໝົດ 18 ທ່ານ, ຍິງ 06 ທ່ານ.

     ໃນລະຫວ່າງວັນທີ 26-28 ກຸມພາ 2025, ກອງທຶນພັດທະນາວິທະຍາສາດ ແລະ ເຕັກໂນໂລຊີ ໄດ້ຈັດພິທີເຊັນສັນຍາຫົວຂໍ້ຄົ້ນຄວ້າວິທະຍາສາດ ຂອງສົກປີ 2024-2025 ແລະ ຝຶກອົບຮົມກ່ຽວກັບການຄຸ້ມຄອງຫົວຂໍ້ຄົ້ນຄວ້າ ທີ່ຫ້ອງປະຊຸມຂອງ ກະຊວງເຕັກໂນໂລຊີ ແລະ ການສື່ສານ (ບ້ານດອນຕິ້ວ ກິໂລແມັດທີ 14, ເມືອງໄຊທານີ, ນະຄອນຫຼວງວຽງຈັນ), ເປັນປະທານໂດຍ ທ່ານ ປອ ສໍາລານ ພັນຄະວົງ ຮອງລັດຖະມົນຕີກະຊວງສຶກສາທິການ ແລະ ກິລາ, ຮອງປະທານສະພາບໍລິຫານກອງທຶນພັດທະນາວິທະຍາສາດ ແລະ ເຕັກໂນໂລຊີ.

     ສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ ໄດ້ຮັບອະນຸມັດງົບປະມານ 01 ຫົວຂໍ້ຄົ້ນຄວ້າ ຄື: “ສຶກສາຄວາມຫຼາກຫຼາຍ ຂອງພືດ ແລະ ເຊື້ອຈຸລະຊີບໃນເຂດນໍ້າອອນ-ພູອາກ, ອຸທະຍານ ແຫ່ງຊາດ ນາກາຍ-ນໍ້າເທີນ (Study on diversity of Flora and Micro-organism at Nam On-Ak mountain, Nakai-Nam Theun National Park)".

     ໃນວັນທີ 21 ກຸມພາ 2025 ຜ່ານມານີ້, ທີ່ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ໄດ້ມີພິທີລົງນາມບົດບັນທຶກຄວາມເຂົ້າໃຈ (MoU) ວ່າດ້ວຍການປັບປຸງຫ້ອງທົດລອງ ເພື່ອກ້າວໄປເຖິງການຮ່ວມມືທາງດ້ານວິຊາການ ລະຫວ່າງ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ກະຊວງສຶກສາທິການ ແລະ ກິລາ ແລະ ບໍລິສັດແອັດແລນຕິກ ອິນເຕີເນເຊີນແນວ ກຣຸບ ຈຳກັດຜູ້ດຽວ (ບໍລິສັດຂອງຄົນລາວ);

ໂດຍການໃຫ້ກຽດລົງນາມ ຂອງ ທ່ານ ປອ ສີພອນ ແສງສຸລິຈັນ ວ່າການແທນຜູ້ອຳນວຍການ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ແລະ ທ່ານ ພູວົງ ສຸ້ຍຍະວົງ ປະທານບໍລິສັດ ແອັດແລນຕິກ ອິນເຕີເນເຊີນແນວ ກຣຸບ ຈຳກັດຜູ້ດຽວ ໂດຍເປັນກຽດເຂົ້າຮ່ວມຂອງ ບັນດາທ່ານແຂກຈາກກົມຄຸ້ມຄອງວິທະຍາສາດ, ຫ້ອງການສະວິທະຍາສາດ ແຫ່ງຊາດ, ກົມຮ່ວມມືກັບຕ່າງປະເທດ ແລະ ພະນັກງານບໍານານ-ອະດີດຜູ້ອໍານວຍການສະຖາບັນ ພ້ອມດ້ວຍ ພະນັກງານ-ລັດຖະກອນ ພາຍໃນສະຖາບັນ ແລະ ບໍລິສັດ ທັງໝົດຈໍານວນ 29 ທ່ານ (ຍິງ 8 ທ່ານ).

      ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ(ສວນ) ໄດ້ດໍາເນີນກອງປະຊຸມປະເມີນ(ຕຳແໜ່ງບໍລິຫານປະເພດ 2) ຂັ້ນຜູ້ອຳນວຍການສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ ເຊິ່ງໄດ້ຈັດຂຶ້ນ ໃນວັນພຸດ ວັນທີ 19ກຸມພາ 2025, ເວລາ 13:30-15:00 ທີ່ ຫ້ອງຝຶກອົບຮົມ ຂອງສະຖາບັນຄົ້ນຄວ້າວິທະຍາສາດ ແລະ ນະວັດຕະກໍາ.

     ກອງປະຊຸມຄັ້ງນີ້ ຊຶ່ງໃຫ້ກຽດເປັນປະທານໂດຍ ທ່ານປອ ສີພອນ ແສງສຸລິຈັນ ວ່າການແທນຜູ້ອຳນວຍການ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ມີຜູ້ຕາງໜ້າຈາກກົມຈັດຕັ້ງ ແລະ ພະນັກງານ 2 ທ່ານ, ກົມກວດກາ 1 ທ່ານ, ມີຜູ້ເຂົ້າ​ຮ່ວມທັງໝົດ 31 ທ່ານ (ຍິງ 12ທ່ານ).

    ຈຸດປະສົງ ຂອງກອງປະຊຸມໃນຄັ້ງນີ້ ແມ່ນເພື່ອປະເມີນຕຳແໜ່ງບໍລິຫານປະເພດ 2 ຂັ້ນຜູ້ອຳນວຍການ ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ໃນພິທີດັ່ງກ່າວ ສະຫາຍ ປອ ສີພອນ ແສງສຸລິຈັນໄດ້ຜ່ານບົດສະຫຼຸບໃນການຈັດຕັ້ງປະຕິບັດໜ້າທີ່ວ່າການແທນຜູ້ອຳນວຍການ ສວນ ໄລຍະຜ່ານ ມີຜົນສໍາເລັດ ແລະ ຂໍ້ຄົງຄ້າງ ໃດແດ່.